Minggu, 21 Juni 2026 – Urip ing padesan kuwi pancen nggawe ayem ing ati. Ora merga bandha sing tumpuk-tumpuk, nanging merga rasa paseduluran lan gotong royong sing isih kempel banget. Kahanan iki krasa nyata lan urip ing omahe Bapak Susanto sing manggon ing Dusun Pojok RT 002 RW 02, Desa Kalirejo.

​Wengi iku, swasana ing njero omah kayu sing prasaja nanging resik iku krasa gayeng banget. Ing sela-selane obrolan santai, guyon maton, lan seduhan kopi sing isih kebul-kebul, bapak-bapak anggota Paguyuban Sinoman "Ngudi Berkah" kumpul dadi siji ngubengi meja. Tembok omah kayu sing dihiasi layangan wujud manuk hantu dadi saksi bisu kencenge tali silaturahmi warga Dusun Pojok.

​Kumpule para warga iki dudu tanpa sebab. Kabeh padha sengkuyung teka kanggo ngewangi, ndedonga, lan mangayubagya kajate kulawarga Bapak Susanto sing lagi nggelar acara Walimatul Tasmiyah (syukuran menehi jeneng si jabang bayi). Ing padesan, yen ana tangga teparo sing duwe gawe, ora perlu diundang ping pindho, kabeh mesthi padha mara nggawa raga, tenaga, lan rejeki.

​Momen sing paling nggawe ati trenyuh yaiku pasrah tampan asil sinoman. Kanthi pasuryan sing sumringah lan salaman sing kenceng antarane perwakilan paguyuban lan sing duwe gawe, dana asil gotong royong diserahake. Salaman kasebut dudu mung sekadar formalitas, nanging wujud amanah, donga, lan rasa welas asih sing jero antarane pepadha.

​Saka udhu utawa kumpule dhuwit urunan sing dilakoni kanthi ikhlas kasebut, asile bener-bener luar biasa. Ing wengi iku, total perolehan sinoman sing kasil dikumpulake tekan angka Rp 27.279.000,-! Angka sing lumayan gedhe iki mesthi wae bakal ngenthengake sanget bebane kulawarga Bapak Susanto anggone nggelar acara syukuran.

​Iki lho buktine yen rukun agawe santosa! Paguyuban Sinoman "Ngudi Berkah" bener-bener dadi wadhah sing nggawa berkah kanggo wargane. Muga-muga si jabang bayi sing ditasmiyahake kelak dadi bocah sing sholeh/sholehah, pinter, lan migunani kanggo desa. Lan sing paling penting, muga-muga tradisi sinoman sing endah ing Desa Kalirejo iki terus urip, dadi gondelan paseduluran tekan anak putu mbesuk. (bj)